Prokuroria shqiptare të mos instrumentalizohet në procese politike

Ende pa përfunduar procesi zgjedhor, u njoftua në shtyp se është arrestuar sekretari i përgjithshëm i PBDK dhe redaktori i gazetës Tema z. Celo Hoxha me një urdhër të kryeprokurorit Theodhori Sollaku. Kryetari i PBDK z. Artur Roshi paralajmëron se janë gati edhe fletë-arrestimet për atë vetë dhe për antarë të tjerë të kryesisë së PBDK. Ndërkohë shtypi i afërt me z. Sali Berisha si "Gazeta 55" ose gazeta "Tema" kanë ndërmarrë një fushatë ku tentojnë të implikojnë emrin e Ballit Kombëtar në skenarë të z. Sali Berisha.

Pa dashur të komentojmë arësyet ose justifikimet e këtyre arrestimeve, iu bëjmë thirrje të gjithë aktorëve të implikuar në këtë maskaradë ku tentohet të luhet me emrin e Ballit Kombëtar që ta ndalojnë sa më parë këtë skenar! I bëjmë thirrje kryeprokurorit Sollaku të tërhiqet urgjentisht nga këto arrestime. I bëjmë thirrje z. Berisha të mos luajë me  emrin e partisë Balli Kombëtar për interesa të tija të ngushta.

Sigurisht që z. Berisha pasi humbi zgjedhjet e 18 shkurtit po tenton të gjejë rrugëdalje. Por nuk ka se përse të përdorë emrin e Ballit Kombëtar për të justifikuar veprimet e tija,  sepse Balli Kombëtar nuk është thjesht një parti politike dosido, por është partia politike që mbron programin e Shqipërisë Etnike, që mund të jetë zgjidhja e vetme për kombin shqiptar.
Balli Kombëtar i bën me dije opinionit të gjerë publik se nuk ka fare të bëjë me skenarët e z. Sali Berisha dhe nuk mban asnjë përgjegjësi për to.
Është interesant të vihet re nxitimi i Prokurorisë në këtë rast, në një kohë që nuk është nxituar kaq shumë edhe për ngjarje shumë më të rënda. Mund të nxirret përfundimi se prokuroria,  ose segmente të të caktuara saj, përpiqen të bëjnë me urgjencë një proces tejet të politizuar ende pa përfunduar procesi zgjedhor.
I bëjmë thirrje Prokurorisë që të qetësohet, të presë më parë përfundimin e procesit zgjedhor, dhe pastaj të shqyrtojë rastin e z. Celo Hoxha etj. së bashku me rastet e komisionerëve  të djathtë apo të majtë të cilët kanë manipuluar jo vetëm firma, por edhe vota! Nuk duheshin harruar këtu as funksionarët partiakë të djathtë apo të majtë (madje më shumë të majtë) që kanë ndërhyrë për influencimin e procesit zgjedhor.
I kërkojmë Prokurorisë që me urgjencë të lirojë z. Celo Hoxha dhe të tërheqë fletë-arrestimet për z. Artur Roshi dhe antarët e tjerë të kryesisë së PBDK! Përndryshe ajo do të bëhet bashkëpunëtore  në skenarë politikë me pasoja të rënda për Shqipërinë dhe kombin shqiptar.

Xhemil Meco