Pranvera e Bostonit me shpërthimin e bujshem të magnolieve karakteristike të Nju-Inglandit, sot, ditën e diel, më 12 maj 2008 ka zbritur në oborrin e Katedrales shqiptare të Shën Gjergjit, në South Boston. Dhjetëra vajza e djem të vegjël shqiptarë, me ngjyrat e tingujt e pranverës, presin me padurim fillimin e Festës së Abetares. Pranë tyre qëndrojnë të emocionuar prindërit dhe mësueset. Ndërsa brenda Katedrales At Artur Liolini duke zhvilluar shërbesën kishtare përsërit herë pas here për festën e fëmijëve që do të zhvillohet në një mjedis të kishës.
Megjithëse për organizimin e kësaj feste u aktivizua drejtoresha e shkollës, shoqëria BESA dhe aktivistë të tjerë të komunitetit, si për çdo aktivitet tjetër që zhvillohet në kishë, kujdesin kryesor e ka At Liolini, i cili, përveç se një ndërtesë për besimtarët, e ka kthyer Katedralen në një qendër kulturore të shqiptarëve. Ndërsa Fan Noli krijoi klasat e shkollës shqipe në kishat shqiptare afër 100 vjet më parë, At Liolini, pasues i Nolit, për vite me radhe ka qenë drejtues i shkollës shqipe me oret e mesimit që zhvilloheshin në sallat e Katedrales së Shën Gjergjit.
Historikisht, shkolla e parë shqipe në Amerikë është hapur më 1908 në Netik të Massaçusetts, nga iniciatori dhe mësuesi Kristo Dako , ku ka dhënë mësim edhe patrioti e mësuesi i shqipes Petro Nini Luarasi. Është frekuentuar gjithashtu shkolla shqipe me emrin "Dardha", e themeluar nga dardhari patriot Kosta Isak. Po ashtu shkolla shqipe në grupe te vogla emigrantësh janë hapur vazhdimisht në diasporën shqiptaro-amerikane. Me çeljen e kishave të para në Boston e në Uster, Mass, nën kujdesin e drejtpërdrejtë të Fan Nolit, u krijuan edhe shkollat shqipe pranë këtyre kishave. Në vazhdimin e kësaj tradite shekullore, në këta hapa të sigurt po ecen edhe Shkolla e Gjuhës dhe e Trashëgimisë Shqiptare në Boston. Është për t'u theksuar ndihma dhe përkrahja që i dha shkollës qysh në fillim ministri i Arsimit të Shqipërisë Genc Pollo dhe vetë ministria, duke dërguar programe, libra dhe informacion. Deputeti Arben Malaj, gjithashtu, ka ndihmuar me libra dhe është kujdesur në vazhdimësi për hapat e pare të ecurisë së shkollës në Boston. Mes shumë emrash aktivistësh të komunitetit përmendim edhe Stefan Koçin, Konsull i Nderit i Shqipërisë, i cili është interesuar vazhdimisht për mbarëvajten e punës së shkollës.
Qysh nga dita e hapjes në mars të vitit 2006 Shkolla e Gjuhës dhe e Trashëgimise Shqiptare ka ecur drejt sukseseve të pritura, mbasi mësuesit dhe grupi drejtues i kësaj shkolle kanë bërë përpjekje për të ngritur nivelin e mësimdhënies. Orët e mësimit bazohen ne një plan pune të huazuar nga Ministria e Arsimit dhe e Shkences e Shqipërisë. Shkolla ka katër klasa, dy prej tyre zhvillohen ne Universitetin e Bostonit dhe dy ne South Boston. Mësueset të cilat kanë në patronazh nga një klasë, janë të diplomuara ne universitetet shqiptare dhe amerikane. Shkolla ka gjithsej 25 nxënës me moshë 6 vjeç e lart. Pas një pune këmbëngulëse të grupit drejtues dhe te mësueseve, tashmë është krijuar një pervojë e mirë: ka filluar bashkëpunimi ndermjet shkollës së Gjuhës dhe Trashëgimisë në Boston me shkollat e tjera simotra, me Akademinë Shqiptaro-Amerikane në Vashington DC dhe me shkollën shqipe në Filadelfia. Grupe te vogla pune, prindër apo të interesuar, gjithashtu, kanë bërë vizita të ndërsjella. Drejtuesit kane në plan që në një të ardhme të organizohen ekskursione për të vizituar këto shkolla, me qëllim që nxënësit e mësuesit të përfitojnë nga përvoja e njeri-tjetrit. Gjithashtu, studentët shqiptarë në Universitetin e Bostonit kanë prezantuar shkollën shqiptare në ambientet e Universitetit dhe në komunitetin shqiptar. Studentët se bashku me znj. Anila Radovani organizuan një koncert më 1 mars 2008 dhe te gjitha të hollat e fituara ia dhuruan fondit të shkollës.
Në Festën e Abetares, e cila filloi pas mbarimit te sherbimit kishtar, moren pjese prinder, gjysher, studentë, mësues, veprimtarë të komunitetit dhe shqiptaro-amerikanë të Bostonit. Mes të ftuarve ishin At Liolini, Albana Orgocka e Mark Kozmo, bashkekryetarë të Shoqatës Shqiptaro-Amerikane, MASS/BESA, juristi Agron Alibali, pedagogu e studiuesi Niko Dako, grupi i TV te Usterit si dhe aktivistë të komunitetit shqiptaro-amerikan: Agron dhe Edlira Gjerasi, Fatmir Beja, Gentiana Pambuku, Artan Simeqi, Vilma Simeqi, e cila ka qenë mësuesja e parë e kësaj shkolle. Merrnin pjesë gjithashtu drejtoresha e shkollës Roza Mija dhe mësueset Myzafere Omeraj, Iljana Kule dhe Vjollca Avrami. Me ngrohtesi e dashuri u priten nga të pranishmit familjet kosovare Gashi: nënat Rifadije dhe Fatmire Gashi me fëmijët e tyre, Arditin, Arjolën dhe Arianin.. Fatkeqësisht, gjatë një aksidenti tre femijët Gashi pësuan djegie të rënda të trupit. Por me ndihmën dhe kujdesin e organizatave shqiptaro-amerikane të Bostonit këta fëmijë po kurohen me sukses në SHBA.
Në fjalën e hapjes së ceremonisë, drejtoresha , Roza Mija falënderoi pjesëmarrësit në emër të kolektivit të shkollës.. "Mësueset e shkollës dhe unë personalisht,- tha ajo,- urojmë që kjo Festë e Abetares të jetë fillimi i një tradite të bukur për komunitetin tonë, që, në çdo pranverë të festojmë mbarimin me sukses të klasës nga nxënësit...Nxënësit e shkollës e meritojnë te festojnë sot perfundimin e Abetares bashkë me ju për të kurorëzuar punën e tyre të palodhur në mësimin e gjuhës shqipe...Ne do të vazhdojmë t'i kushtojme cdo nxënësi vemendje te veçante, duke u nisur nga motoja e shkollës sonë : "asnjë
nxënës të mos mbetet prapa'. Të gjitha mësueset tona kanë punuar seriozisht e me përkushtim për t'u mësuar nxënësve jo vetëm të shkruajnë e të lexojnë shqip, por gjithashtu t'u japin atyre njohuri për kulturën, historinë e traditat shqiptare. " Më tej drejtoresha nënvizoi rëndësinë e pjesëmarrjes dhe bashkëpunimit ndermjet prindërve dhe personelit mësimor. Ajo tha se shkolla e ka "derën te hapur" për çdo këshillë apo sugjerim. "Në bazë t propozimeve që kemi marrë nga prindër e dashamirës,-nënvizoi ajo,- gjatë vitit të kaluar është bërë diferencimi i nxënësve nëpër klasa, është rritur gjallëria e hareja gjatë kohës së tyre të lirë, jane shtuar aktivitetet në klasë dhe jashtë saj. Komunikimi ne gjuhën shqipe ndermjet nxënësve si dhe dëshira e tyre për të marrë pjesë aktivisht në orët e mësimit dhe në aktivitetet jashtëshkollore, janë shpërbilimi më i mirë i punës sonë."
Sipas drejtoreshes,në mënyrë që shkolla të jetë sa më efektive, në semestrin e ardhshëm do të ketë tri nivele: nivelin fillor, nivelin e ndërmjetëm dhe nivelin e avancuar. Cdo nxënës do t'i nënështrohet një provimi të miratuar nga grupi drejtues, për të përcaktuar nivelin që i përshtatet. Fëmijët që mbaruan abetaren, do të vazhdojnë me studimin e librit "Gjuha Amtare" 1 dhe 2 (Këndimet), të cilat u sollën nga Shqipëria. Pastaj ajo ftoi të gjithë mësuesit e diplomuar në Shqipëri ose në Amerikë, të ndihmojnë që të hapen klasa të reja në zonat jashtë Bostonit, me qëllim që t'u krijohet mundësi të gjithë fëmijëve shqiptarë në Massaçusetts për të mësuar gjuhën shqipe. Duke përfunduar, drejtoresha falënderoi Shoqatën MASS/BESA pa ndihmën dhe bashkëpunimin e së cilës për shkollën do të ishte vështirë të arriheshin këto suksese. Ajo falenderoi qeverinë lokale amerikane dhe atë të Shqipërisë për ndihmën e dhënë, falenderoi Universitetin e Bostonit, kishen e Shen Gjergjit dhe kishen e Shën Trinisë që i kanë hapur dyert për të krijuar mjedise të përshtatshme mesimi për nxënësit e shkollës. Gjithashtu, ajo falenderoi drejtorin e TV te Usterit Arben Kamberin, i cili ka ndihmuar ne prezantimin e shkolles se Bostonit ne televizion. "Së fundi, në mënyrë të veçantë falënderoj vetë nxënësit e shkollës për përpjekjet e tyre të vazhdueshme, prinderit, gjyshërit e gjyshet qe me kujdes e dashuri i ndihmojnë ata në shtëpi, si dhe mësueset e tanishme dhe ato të mëparshmet për punën e tyre fisnike e të nderuar."
Në vazhdim, të pranishmit ndoqën një koncert artistik me recitime e këngë nga nxënësit e shkollës. Fëmijët shqiptarë, veshur bukur e me kapele të bardha ku ishte vizatuar një shkronje e alfabetit, kënduan këngën e abetares duke duartrokitur e duke persëritur vargun "Abetare, abetare - si vjen dielli në dritare!" Gjyshërit e prindërit i ndiqnin të mallëngjyer nga salla e bashkë me fëmijët lëviznin edhe ata buzët duke i shoqëruar në këngë apo në recitime. Kur po këndohej kënga e mësuesit : / Ditën e mësuesit/ Ne sot po festojmë / Lulet më të bukura / Ne do t'i dhurojmë.../ iu afrova Niko Dakos, ish- pedagog i Universitetit "Fan Noli" të Korçes. "Para dy vjetësh, më 2006, kur u themelua kjo shkollë, -tha ai,- e pata krahasuar me nje tempull. Sot shpreh gëzimin dhe dëshirën që ky tempull i denjë i atdhedashurisë, ky institucion i mësimit të gjuhës shqipe, të mbajë të ndezur dritën e tij dhe, me këtë dritë të frymëzojë dhjetëra e dhjetëra fëmijë të tjerë shqiptarë. Vërtet ndjehem i gëzuar që kjo shkollë është vazhduese e një tradite të shkollës së parë shqipe në SHBA, që e themeloi dhe ka dhënë mësim nje nga paraardhesit e mi, Kristo Dakoja, 100 vjet më parë e pastaj u vazhdua nga Fan Noli gati para një shekulli. Dëshiroj dhe uroj që kjo traditë të mos ndryshohet por të vazhdojë gjithnjë e freskët, e fuqishme... Në këto momente ndiej ngazëllim kur shoh këta fëmijë sepse nuk shkëputem dot nga profesioni i mësuesit, të cilin e kam ushtruar për 40 vjet. Jeta e mësuesit është e bukur me fëmijët dhe ndjehem i lumtur kur kujtoj që bashkë me kolegët e mi kemi kaluar nëpër duar 40 breza nxënësish...Uroj mësuesit dhe nxënësit e kësaj shkolle ta mbajnë gjallë dashurinë për gjuhën tonë amëtare dhe ta duan me gjithë shpirt Shqipërinë, aty ku janë rrënjët e tyre, rrenjet e te gjithe neve."
Ndërkaq, fëmijët përshëndesin që nga skena: "Të dashur prindër! Të dashur gjyshër e gjyshe! Të dashur nxënës dhe mësues! Ju urojmë të gjithëve mirëseardhjen në festën tonë të bukur të Abetares:
Që kur nënat tundin djepin,
Gjuhën shqipe na mëkojnë
Dhe na lenë amanetin
Që si sytë atë ta mbrojmë"
Gjuha jonë arbërore / Gjuhë e bukur, gjuhë trimash / Vjen si flladet pranverore/ Ligjërim pa fund bilbilash/..../Shkronjës "A" dhe shkronjës "T",/ Po t'i shtojmë edhe rrokjen "DHE"/ I bashkojmë, i lexojme dhe dëgjojmë emrin "Atdhe"./"
Ndërkohë që dëgjojmë recitimin: "Gjuha jonë sa e mirë, sa e ëmbël, sa e gjerë,/ Sa e lehtë, sa e lirë, sa e bukur, sa e vlerë/, ne sallën e ceremonisë disa prindër sollën e vendosën mbi tavolinë tortat e bardha, si faqe fletoresh, të stolisura me shkronja të arta të alfabetit shqiptar. Nxënësit këndojnë në kor:
" Gjuha jonë, gjuhë gjyshe, tridhjetë e gjashtë dallëndyshe."
Erdhi dhe çasti i lumtur, kur nxënësve, një nga një iu dha dëftesa e kalimit të klasës dhe ata i lenë lamtumirën Abetares, librit të parë, për të studiuar libra të tjerë. Gjyshërve u vezullojnë sytë nën syze. Prindërit ndjehen krenarë. Juristi Agron Alibali, me banim në Boston, që ka dy djemtë e tij në këtë shkollë, në diskutimin e tij tha: "Shkolla shqipe e Bostonit është një arritje e madhe e bashkësisë, që përcjell më tej traditën e shkollave më t hershme të ngritura nën drejtimin e "Vatrës" së Nolit, Konicës dhe burrave të tjerë të shquar të kombit tonë. Themeli i hedhur nga ata dhe i çimentuar sot nga bashkësia e Bostonit pritet të sjellë në një të ardhme të afërt institucionalizimin e plotë të shkollës shqipe të Bostonit, duke siguruar, para së gjithash edhe ndërtesën e përshtatshme të shkollës.
Le të punojmë të gjithë bashkë për blerjen dhe administrimin në të ardhmen të godinës së shkollës shqipe të Bostonit"
Albana Orgocka e Mark Kozmoja përshëndetën në emër të shoqatës MASS/BESA dhe pergëzuan drejtoreshën dhe mesueset e shkollës për punën e tyre të mrekullueshme e të përkushtuar. Dy drejtuesit gjithashtu iu drejtuan komunitetit shqiptar të Bostonit që të dërgojnë fëmijët e tyre në shkollë.
Gjatë ceremonisë u perkujtua dhe festa tjetër dhe u uruan nënat per ditën "Mother's Day". Myzi Ormanaj, me këte rast, recitoi një poezi kushtuar nënës. Para recitimit ajo përshëndeti të gjitha nënat që ndodhen këtu, në Amerikë, dhe ato që ndodhen në atdhe. Në vargjet e saj prekëse pershkruhej zemerdhembshuria e nënës, që, dikur, herët në mëngjes vendoste në një tepsi racionin e bukës për fëmijët që niseshin për në shkollë. Tani tepsia, në vend të ushqimeve është mbushur me mall, sepse fëmijët janë rritur e janë shpërndarë nëpër botë.
Në përshëndetjen e tij At Liolini tha: " Jam krenar për punën e perkushtuar të drejtoreshës Roza Mija dhe të mësueseve...Ta mësojmë, ta ruajmë dhe ta vazhdojmë gjuhën tonë të shenjtë e të shtrenjtë shqipe... Festën e Abetares për koincidencë, po e kremtojmë në përvjetorin e 100-të te Kongresit të Manastirit, ku u caktua alfabeti i gjuhës shqipe. Ndërsa gjuha angleze e përdorur në tërë botën, ka vetëm 26 shkronja, gjuha shqipe, gjuha e nje vendi te vogël, numëron 36 shkronja!" Pastaj ai iu drejtua nxënësve, u uroi suksese e u tha me humor: " Kapelet tuaja që keni vendosur në kokë, seç më ngjajnë si kapele peshkopi ! Uroj që një ditë, ndonjeri prej jush të bëhet peshkop, sepse na mungojnë peshkopët!"
Pasi morën dëftesat dhe ua dorëzuan prindërve, fëmijët, të shpenguar, filluan të vraponin nëpër mjediset e kishës të ndjekur nga vështrimet e qeta të shenjtorëve. Të mësuar me cicërimat e tyre në dhjetëra e dhjetëra vite, duket sikur edhe shënjtorët nga muret përshperitin fjalë shqip nga buzët e tyre të holla. Takohem me dy nxënëset e kësaj shkolle Majlinda Bajrami dhe Angela Bajrami, dy motrat, të cilat më treguan se kishin dalë në fotografi me Hillari Klinton ne Boston, në shkurt 2008, gjatë fushatës elektorale. "Hillari do të bëhet presidente!" ,- më thanë ato gati me një gojë.
Në mbarim të ceremonisë të pranishmit shijuan disa pjata me gatime shqiptare. Vëreja këta prindër shqiptarë të diasporës që bëjnë kaq sakrifica per t'i sjellë e për t'i marrë fëmijët nga shkolla, pa llogaritur ngritjen e çmimit të benzinës. Prindër të tillë meritojnë të cilësohen "patriotë!". Aktivisti i komunitetit dhe prindi i dalluar Agron Gjerasi tha para të gjithëve: Pse i çoj fëmijët e mi në shkollën shqipe? 1: Sepse gjuha shqipe është gjuha e prindërve, e mëmëdheut që nuk duhet harruar. 2: Është gjuha e gjysherve dhe e gjysheve. Djali im i vogël do ta humbiste dashurinë për gjyshen, në qoftë se nuk do të dinte gjuhën shqipe të komunikonte me të. 3: Duke ditur gjuhën shqipe, fëmijët tanë, kur të rriten, do të dinë një gjuhë më tepër se moshatarët dhe do të jenë krenarë kur të prezantohen se janë shqiptarë.
4: Nëpërmjet shkollës nxënësit kanë kontakt me njer-tjetrin dhe kjo shoqëri do të vazhdojë edhe kur ata të rriten e mbase, mund të bëhemi edhe krushq! Ku ta gjej të bëj krushqi me shqiptarët!"
Prindërit e kujdesshëm Ardit dhe Vjollca Dibra, me banim në qytetin e Lynnit i sjellin dy fëmijët e tyre me kënaqësi në shkollën e Bostonit, por edhe me sakrifica, sepse, mbi të gjitha duhet koha për t'i çuar e per t'i kthyer. "Duke mësuar gjuhën shqipe fëmijët e mi,-thotë Arditi,- do të pasurojnë kulturën e tyre, dhe, më e rëndësishmja, veç përvetësimit të gjuhës amtare, do të perfitojnë edhe traditat dhe zakonet e mira që populli ynë ka trashëguar në shekuj...Do ta pasurojmë bibliotekën e shtëpisë me libra në gjuhën shqipe...Do të pajtohem edhe te gazeta "Illyria", nëpërmjet së cilës, familisht, do të mbajmë lidhjet me atdheun."
Grupi drejtues i shkollës shqipe të Bostonit, me moton: "integrim pa asimilim" po bën përpjekje për te çuar më tej punën mësimore-edukative të shkollës, që ajo të jetë e koordinuar me pjesëmarrjen e arsimtarëve dhe nxënësve, me programet e mësimdhënies, me pajisjen me libra, mjete e kaseta mësimore etj. Komuniteti shqiptaro-amerikan i Massaçusetsit është rritur me mbi 20.000 emigrantë. Shkollat shqipe të çelura për fëmijët e tyre do të ruajnë dhe zhvillojnë gjuhën dhe trashëgiminë e kulturës shqiptare. Fëmijët emigrantë do të mësojnë gjuhën shqipe si dhe kulturën, historinë e gjeografinë e Shqipërisë. Të rinjte qe do të mësojnë në këto shkolla, nuk duhet të mjaftohen vetëm me studimin sa për të folur e shkruar shqip, por, më tej, kur të rriten, të zgjerojnë njohuritë shkencore për gjuhën shqipe, si gjuhë kulture, për ta përdorur krahas gjuhes angleze. Gjenerata e re që po hedh shtat sot, është e pajisur me zgjuarsinë e guximin natyror që gjenden të trashëguara në gjenet e shqiptarëve. Këta të rinj e të reja do të përçojnë më tej pulsin e shqiptarisë nëpër breza.
Komente nga lexuesit
Koment nga GUEST më 2008-06-05 11:24:16 Pershendesim me gezim te math, FESTEN E ABETARES. Lexuam me endje kete ngjarje shume domethenese qe u zhvillua ne Katerdalen e SHENGJERGJIT ne Boston,me rastin e 100 vjetorit te celjes se SHKOLLES SE PARE SHQIPE nga perkuidesi i At ARTUR LIOLINIT dhe gjithe emigranteve te brezit te vjeter dhe te ri. Ndjehemi krenare qe stafeta e brezave vazhdon te kaloje nga njeri brez ne tjetri per gjuhen tone, sa te lashte aq edhe te vecante.Nje pune e tille behet edhe ketu ne Fildalfia ne Kisha e SHEN JOHANIT, ne qender te qytetit, me aq vlera te medha historike edhe per shqiptaret emigrante.Intelektualet emigrante te rinj, kane nje mision te math sot ne SHBA,jo vetem te ringjallin traditat aq te mrekullushme te Patrioteve legjendare te shqipes dhe kultures tone,si talenti i math Fan S.Noli, me mesonjesit e shquar K.Dako,P.N.Luarasi etj, por ti cojne me lart keto gjurme te tyre,ne nje kohe kur pa kuidesin e mesonjesve te rinj,rezikohet edhe pakesimi i femijeve tane per te mesuar me perkushtim gjuhen e nenes,gjuhen shqipe.Na duhet ne te arthmen te ngrihet nje grup pune i vecante me mision:Kordinimin e punes me abetaren shqip,ne te gjithe Ameriken.Ky grup pune se pari te regjistroje familjet shqiptare ne qytetet e ndryshme te SHBA-se dhe me tej, ne c'do qytet te dalin emrat e mesonjesve qe do punojne me ABETAREN SHQIP.Duke pare se gjurmet e kesaj pune me tradita,na cojne ne Boston, ne Kisha e SHENGJERGJIT, le te sherbeje kjo kishe me nje grup te vecante emigratesh te rinj, si berthame per kordinimin e punes ne gjithe Ameriken.Neser kjo fillese do lavderohet nga te gjithe patriotet si nje nisme me vlera te gjera,per gjuhen tone te dashur shqipe. Me kete rast,urojme Z.ARTUR LIOLININ shendet dhe suksese si figuren Nr1,per kuidesin qe deshmoi,lidhur me FESTEN E ABETARES SHQIP.Kemi besim se autoriteti dhe kultura e tij e gjere do cele nje brazde te re,per nje pune me te madhe ne gjithe Ameriken, ku ka dhe jetojne shqiptare, per perhapjen e ABETARES SHQIP. Edhe ne emigrantet e rinj,nuk do kursehemi kur te shohim se na prin nje figure e shquar si ajo e Z.ARTUR LIOLINIT. Pershendetje nga Ligor Luarasi,Levitaun SHBA.
Koment nga GUEST më 2008-10-07 23:16:23 e lexova ket shkrim i cili më mujtoi ditet e mësimit të Abetarës . Tani edhe une që punoj në bartjen e dijës tek nxënësit,shume kujdes i kushtoj festës së Abtarës, ku kame një numër programësh të realizuara . N♪7se dëshironi të bashkpunoni dhe t,i shihni ,jame ne dispozicionin tuaj.adresa ime e imelit eshte
Koment nga GUEST më 2008-11-14 00:54:43 Ju lumte atyre qe mendojne si te zgjerojne mesimin e gjuhes shqipe,sepse e shoh se shume shqipetar nuk kane interes te mesojne femijve te tyre gjuhen meme! edhe une jam nje prind qe kam shume deshire te mesoj gjuhen shqipe dy femijeve te mij por me ka ngelur vetem shtepia ajo qe munde te bej per ta,pasi ketu ne NJ nuk kemi shkolle shqipe, duke perfunduar ju pershendes dhe ju uroj suksese te gjitheve atyre qe kane ndikuar ne hapjen e shkolles shqipe ne usa faleminderit nga Teki Hoda 257 7th street clifton nj 07011 usa!
Koment nga GUEST më 2009-01-08 00:10:21 keni bere shume mire.Bravo
Koment nga GUEST më 2009-02-25 16:57:03 jeni shume te mire edhe keni be mire
Koment nga GUEST më 2009-02-27 00:19:09 jenii shum shum te mireeeeeeee
Koment nga GUEST më 2009-03-01 00:50:02 ju pershendesim dhe ju lumte qe nuk harroni gjuhen shqipe qe eshte e bukur dhe e vecante
Koment nga GUEST më 2009-04-28 14:25:47 ju lumt shum bukur ju pershendet alma denisa dhe laureta
Koment nga GUEST më 2009-04-28 14:25:55 ju lumt nga adea pula
Koment nga GUEST më 2009-05-08 14:17:25 shum te mir jeni bravo