Para disa ditësh Presidenti z. Bamir Topi  i Shqipërisë përcaktoi 28 qershorin si datën e zgjedhjeve të ardhëshme parlamentare. Por PBK rrezikon të mos marrë pjesë në këto zgjedhje. Sipas kodit të ri zgjedhor të miratuar më 30 dhjetor 2008, që një parti politike të marrë pjesë në zgjedhje, duhet që të ketë të paktën një deputet në Kuvendin aktual. Aktualisht PBK nuk zotëron asnjë mandat në Kuvend.
Neni 68 i Kodit Zgjedhor thote: "Lista e kandidatëve për Kuvendin, të paraqitura nga partitë politike të cilat nuk zotërojnë asnjë mandat në Kuvend, duhet të mbështetet nga jo më pak se 10 000 zgjedhës".
Pra sipas këtij neni, PBK nuk do të mund të marrë pjesë në zgjedhje dhe nuk do të mund të paraqesë kandidatët e saj nëse nuk arrin të mbledhë 10 000 firma nga përkrahësit e tij.

Por mbledhja e 10 mijë firmave do të jetë problematike. Kryesia aktuale e PBK e drejtuar nga z. Adriatik Alimadhi është mjaft e ftohur dhe e larguar nga degët dhe antarët e PBK. Prej kohësh ka patur kontestime në lidhje me paaftësine dhe mungesën e punës nga kjo kryesi. Pas kongresit të fundit të zhvilluar në korrik 2008 kontestimet janë bërë edhe më të shumta dhe situata është mjaft e rënduar.
Nëse PBK nuk do të arrijë të regjistrohet pranë KQZ-së, do të jetë kjo hera e parë që nga viti 1993 që Balli Kombëtar nuk merr pjesë në një proces zgjedhor.

A.M