Pa u mbushur mirë 3 vjet nga Pavarësia e Kosovës, kosovarët po i hynë një  aventure të rrezikshme: po zgjedhin president një biznesmen të quajtur Behgjet Paçolli. Një biznesmen kosovar i cili e ka ushtruar aktivitetin e tij në Zvicër dhe në Rusi. Një biznesmen kosovar që ka miq të fuqishëm në Rusi. Një biznesmen kosovar që është i martuar dhe ka fëmijë me një ruse.
Natyrisht që jeta private i përket gjithsecilit. Por kur pretendon për presidencën e një vendi, jeta private bëhet publike, sepse mund të ketë pasoja për fatet  e vendit.

Ajo që është shumë e çuditshme, është lehtësia me të cilën ky biznesmen i drejtohet presidencës së Kosovës, kur dihet lufta e ashpër politike që mbizotëron aty.  Në krye të një partie të vogël por me mjete të mëdha financiare,  Paçolli po i imponohet Kosovës, duke shfrytëzuar një situatë politike mjaft të çuditshme. PDK e Hashim Thaçit  ka nevojë për aleatë për të formuar qeverinë, dhe çuditërisht refuzon çdo aleancë me LDK, AAK dhe Vetëvendosjen duke vendosur për një aleancë me AKR-në e Paçollit. Arësyet e këtij vendimi janë të mistershme, por vlen të shënohet që PDK refuzon aleancën me të gjitha ato formacione që kanë qenë të lidhura me luftën ashtu si ajo vetë. Vlen gjithashtu të shënohet që Hashim Thaçi që prej dhjetorit të kaluar, apo më saktë që prej zgjedhjeve të kaluara është nën presion nga Këshilli i Europës nëpërmjet raportit të Dick Martyt.

Kandidatura e Behgjet Paçollit është pritur në mënyra të ndryshme në Kosovë. Ka disa që besojnë me naivitet se ai do të investojë në Kosovë dhe si me magji ekonomia kosovare do të rregullohet. Por fatkeqësisht biznesmenët e zotë nuk bëhen politikanë të mirë, sepse kanë  botëkuptime krejt të ndryshme.
Por ka edhe nga ata që e shikojnë me shqetësim këtë kandidaturë të një biznesmeni  rusofil të katapultuar në krye të shtetit kosovar, i cili nesër do të flasë dhe do të marrë vendime  në emër të Kosovës.

Do të ishte e arësyshme që kosovarët të mos e votojnë kandidaturën e Behgjet Paçollit, i cili nuk besojmë se është njeriu që i duhet sot Kosovës për President. Në këtë funksion duhet të zgjidhet një personalitet më një eksperiencë të gjatë të aktivitetit politik në Kosovë, një njeri i besueshëm dhe pa ambiguitet, një shqiptar i vendosur. Përndryshe aventura nga më të rrezikshmet mund ta presin Kosovën në muajt dhe vitet që vijnë. Dhe nuk do të ishte hera e parë në histori që shqiptarët me duart e tyre prishin në një moment hutimi atë qe me aq mund dhe gjak ndërtojnë në vite.

A.M