Viti 2012, viti e 100-vjetorit të Pavarësise,  ka nisur vrullshëm.  Në Tiranë klasa e vjetër politike përpiqet të shkarkojë nga detyra dhe të neutralizojë nën Kryetarin e Këshillit të Lartë të Drejtësisë, Kreshnik Spahiun. Në Prishtinë qeveria arreston protestuesit që nuk duan që Serbia të kalojë dhe të bëjë ç'të dojë në Kosovë. Shoqëruar kjo me një propagandë të egër kundër Kreshnik Spahiut dhe Aleancës Kuq e Zi në Tiranë dhe Albin Kurtit dhe Vetëvendosjes në Prishtinë.  Këto dy lëvizje janë sot përfaqësueset më të reja të nacionalizmit të ri shqiptar. Aktiviteti i tyre është fokusuar tek probleme kombëtare :  respektimi i sovranitetit të Kosovës, ndalimi i manevrave greke për të greqizuar Shqipërinë e jugut, respektimi i identitetit dhe  kombit shqiptar si dhe bashkimi kombëtar.
Por ky aktivitet nuk iu pëlqen qeveritarëve në Tiranë dhe në Prishtinë. Klasa politike e Tiranës e ka treguar në shumë raste se nuk i intereson çështja kombëtare dhe nuk ka as ndërgjegjen më minimale kombëtare. Kurse klasa e re politike e  Prishtinës, megjithëse ka një ndërgjegje kombëtare më të lartë,  ka hyrë në rrugën butë të pushtetit dhe betohet për planin e Ahtisarit, plan të cilin as vetë autori rrezik nuk e beson më pas situatës së krijuar në veriun e Kosovës.

Qeveritarët shqiptarë në të anët e kufirit janë me sa duket të vendosur për të goditur nacionalizmin shqiptar dhe për të penguar bashkimin kombëtar, për interesa të ngushta partiake dhe të mbajtjes së pushtetit. Por e kanë të kotë. Lëvizja për bashkimin kombëtar është një lëvizje e fuqishme që përfshin të gjitha trojet shqiptare. Në 100-vjetorin e Pavarësisë, Shqiptarët dhe sidomos rinia shqiptare, janë më të ndërgjegjësuar se kurrë për çështjen kombëtare dhe janë të gatshëm për të realizuar bashkimin kombëtar. Pengesat që po nxjerrin dhe do të nxjerrin pushtetarët nuk do të kenë efekt dhe të tejkalohen.

Më kotë përpiqet Berisha të denigrojë Aleancën Kuqezi dhe drejtuesit e saj. AK  nuk është as e majtë e as e djathtë, por është një lëvizje mbarëkombëtare e cila synon të zgjidhë probleme kombëtare. Berisha mund të shkarkojë Kreshnik Spahiun nga detyra e tij, por nuk do të arrijë ndalojë lëvizjen kombëtare e cila sa vjen dhe forcohet. Më kot arreston Thaçi aktivistët e Vetëvendosjes, sepse vetëm sa ndërgjegjëson shqiptarët se ora e bashkimit ka trokitur.

Lëvizja kombëtare e  ka burimin që nga Lidhja e Prizrenit dhe nuk ka për të reshtur derisa të realizohet bashkimi kombëtar. Këtë lëvizje nuk mund ta ndalin as interesat partiake dhe as ato të pushtetmbajtjes, as  integrimet demagogjike dhe as retorikat  përçarëse. Kjo lëvizje ka nisur rrugën e saj dhe do t'i shkojë deri në fund, sepse bashkimi kombëtar është zgjidhja e vetme e çështjes shqiptare dhe e vendosjes së paqes në rajon.  Sot ka ardhur koha e bashkimit kombëtar. I takon brezit të sotëm nderi për ta realizuar këtë bashkim për të cilit është  luftuar që prej 130 vjetësh.

Xhemil Meço