Më datën 23 nëntor ditën e dielë komuniteti shqiptar i Nju-Xhersit organizoi një mbrëmje festive me rastin e 28 Nëntorit, Ditës së Flamurit. Në këtë mbrëmje madhështore morën pjesë këngëtarja e mirënjohur nga Vlora - Maya Aliçkaj,  e cila me zërin e saj fantastik dhe interpretimin e veçantë të këngës popullore shqiptare e ngriti sallën në këmbë. Merrnin pjesë edhe këngëtaret Merita Halili dhe Morena Reka, si dhe këngëtari Edi Duro të shoqëruar nga orkestra e Mjeshtrit Raif Hyseni. Një bukuri të veçantë i dha mbrëmjes një grup valltarësh nga Kosova i ftuar në mbrëmje.

Mbrëmja filloi me interpretimin e himneve kombëtarë, më pas u mbajt një minutë  heshtje në kujtim të gjithë atyre që kanë dhënë jetën për kombin shqiptar. Z. Bekim Xhaferri, një nga organizatorët kryesorë, përshëndeti të pranishmit me një fjalë të shkurtër. Pas kësaj,  filluan festimet dhe argëtimi me këngë  e me valle shqiptare të interpretuara nga  këngëtarët e shquar të muzikës popullore shqiptare. Atmosfera ishte e ndezur dhe të pranishmit kaluan një mbrëmje të këndshme nën tingujt e muzikës shqiptare.