Burime pranë Këshillit Kombëtar të PBK njoftojnë se pritet të mbahet së shpejti mbledhja e Këshilli Kombëtar për të  përcaktuar datën,  mënyrën e organizmit, rregullat e përfaqësimit, dhe mënyrën e zgjedhjes së delegatëve të Kongresit të radhës së PBK.
Kongresi i kaluar është mbajtur në dhjetor të vitit 2003 dhe zgjodhi si kryetar z. Adriatik Alimadhi. Kongresi i PBK  mbahet çdo 4 vjet dhe zgjedh kryesine e re PBK me  votim të fshehtë.

Balli Kombëtar u rikrijua në Shqipëri pas rënies së regjimit komunist në vitin 1992. Kongresi i mbajtur në Tiranë në   vitin 1994 zgjodhi kryetar Prof. Abas Ermenjin, i cili u rizgjodh në këtë funksion edhe në kongresin e qershorit  1998. Në kongresin e mbajtur në nëntor 2002 u zgjodh kryetar i PBK z. Shpëtim Rroqi, i cili qëndroi në këtë  funksion vetëm një vit, pasi në dhjetor 2003 u thirr Kongresi i Jashtëzakonshëm i cili zgjodhi në funksionin e kryetarit z. Adriatik Alimadhi.

Gjatë periudhës që z. Adriatik Alimadhi ka qëndruar në funksionin e kryetarit, PBK ka patur një përfaqësim modest   në politikën shqiptare. PBK nuk arriti të përfaqësohet në Parlamentin shqiptar në zgjedhjet e korrikut 2005, por  arriti të fitonte disa komuna në zgjedhjet vendore të shkurtit 2007.   Ndërkohë ka patur mjaft kritika në drejtim të  kryesisë aktuale për apati dhe mosveprim në situatën aktuale të zgjidhjes së çështjes së statusit të Kosovës. Antarësia e Ballit Kombëtar synon që në këtë kongres të zgjedhë një kryesi të re, dinamike dhe të aftë që të  përballojë sfidat e kohës dhe të bëjë hapa përpara në realizimin  e programit të Ballit Kombëtar Dekalogut, i cili përcakton si objektiv kryesor Shqipërinë Etnike.

 Korresp. i gazetes "Balli i Kombit"