Debati mbi emrin e Universitetit të Vlorës ka përfshirë shumë bashkatdhetarë ditët e fundit dhe duket se është një çështje mjaft e ndjeshme. Mendoj që vetë ekzistenca e këtij debati është një shenjë e mirë per zhvillimin e ndjenjës kombëtare shqiptare dhe tregon  se po shkojmë drejt një nacionalizimi të vërtetë i cili nuk është as i imponuar dhe as i shpërfillur.
Në lidhje me debatin, mendimi im është që ndryshimi i emrit të Universitetit të Vlorës nuk do të kishte një efekt pozitiv, duke patur parasysh kontekstin lokal të qytetit. Nëse ka një personazh historik  në Vlorë që i bashkon të gjithë, të majtë e të djathtë, komunistë e ballistë, socialistë e demokratë, ky është vetëm Ismail Qemali, njeriu që bëri aq shumë për të gjithë kombin dhe për të cilin vlonjatët janë krenarë, ndoshta edhe në mënyrë pak lokaliste. Prandaj ndryshimi i emrit të Universitetit nuk mund të pritej mirë nga opinioni vlonjat, dhe ishte e parashikueshme që të shkaktonte reagime ashtu siç edhe ndodhi.