Derisa në fund të shtatorit të kaluar, qeveria e re e bazuar në koalicionin PD-LSI, futi me nxitim dhe thuajse fshehurazi në axhendën e parlamentit, për ratifikim marrëveshjen për delimitimin e kufirit detar me Greqinë.
Megjithatë kjo u mor vesh dhe shkaktoi një shqetësim të gjithanshëm. Për më tepër, një studim i realizuar ndërkohë nga ekspertë të ushtrisë tregonte se delimitimi ishte bërë në favor të palës greke, dhe Shqipëria humbiste 354 kilometra katror hapësirë detare. Zëra të shumtë u ngritën kundër këtij ratifikimi në media dhe në jetën publike. Një peticion kundër kësaj marrëveshje i organizuar në internet, mblodhi brenda pak ditësh më shumë se 3 mijë nënshkrime  nga shqiptarët  në Shqipëri, Kosovë, emigrim etj. duke treguar se ndryshe nga politikanët e Tiranës, shqiptarëve iu dhimbset çdo metër katror i territorit të Shqipërisë, qoftë ky në tokë apo në ujë.
 Të përballur me këtë presion të paparashikuar nga llogjika e tyre e pazarllëqeve, pushtetarët e Tiranës e hoqën nga axhenda e parlamentit ratifikimin e marrëveshjes. Por kjo nuk do të thotë se e kanë harruar atë, por vetëm se presin një moment kur shqiptarët të jenë në gjumë për ta bërë ratifikimin të qetë e të patrazuar.
Aktualisht kjo marrëveshje është dërguar në Gjykatën Kushtetuese nga opozita e majtë dhe një grup partish të djathta jo-qeveritare për të verifikuar nëse përputhet me Kushtetutën e Shqipërisë.
Në këtë situatë qeveria e Shqipërisë ka ndërmarrë një fushatë mediatike për t'iu mbushur mendjen shqiptarëve se kjo marrëveshje është në interes të Shqipërisë. Ose më saktë për të na mbushur mendjen se "katrani zbardhëllon". Flamurin e kësaj fushate e ka marrë ministri i jashtëm "pragmatik" Ilir Meta. Deri dje Meta, megjithëse i majtë,  kishte bërë një emër të mirë si një politikan dinjitoz dhe pa komplekse ndaj të huajve. Për më tepër "i papajtueshëm"  me politikanë "anti-kombëtarë" si Nano dhe Berisha. Dhe LSI paraqitej si një forcë serioze vërtetë e majtë por me dinjitet kombëtar. Kurse sot ç'të shikojmë: një ministër të jashtëm që na flet për kesonofobi në mes të detit ku nuk ka njeri dhe që duket qartë që i ka lënë principet peng në pazaret e beharit të kaluar në Dhërmi. Si dhe një LSI që me këtë akt shënoi fundin e saj politik.
Në skenën e kësaj fushate është ngjitur edhe bukuroshi Basha, i cili shkon edhe më larg. Sipas tij, ata që sulmojnë marrëveshjen paskan interesa anti-shqiptare??!! Kurse qeveria shqiptare që i fal Greqisë 354km2 mbroka interesa shqiptare? Z. Basha para se të mbrojë marrëveshjen, është mirë të na sqarojë se përse llogaritja e vijës "baraslarguar" së kufirit bazohet në shkëmbinj për palën greke dhe në tokë për palën shqiptare? Cila është përmbajtja e pazarllëqeve të tij me ministren e jashtme greke Dora Bakojanis? Cfarë angazhimesh të tjera ka marrë qeveria shqiptare ndaj Greqisë?
 
Konceptuesit e fushatës pro ratifikimit, përpiqen ta paraqesin kundërshtimin e marrëveshjes si vepër të Edi Ramës, drejtuesit të opozitës, për të destabilizuar qeverinë. Por kjo marrëveshje kundërshtohet nga shqiptarët anë e mbanë trojeve shqiptare si dhe në emigrim. Influenca e Edi Ramës nuk është kaq e madhe. Është i gjithë kombi shqiptar që është i tronditur thellë  dhe e kundërshton këtë marrëveshje. Është shpirti i kombit që e ndien se po përpiqen ta dhunojnë.
Por këtë nuk mund ta kuptojnë politikanët  dhe pushtetarët për të cilët çdo gjë është pazar. Prandaj vazhdojnë në rrugën e tyre anti-kombëtare pa u skuqur dhe u nxirë. Këta mjeshtra të pazareve  është mirë të kuptojnë një gjë: pazaret e kufijve nuk janë bërë asnjëherë as me lek, as me euro dhe as me dollarë, por vetëm me gjak dhe me armë.

A.M