Ditën në piknik, darkën në restorant Santa Lucia falas

Shqiptarët në Zelandën e Re për festën e 28 Nëntorit u mblodhën në parkun e bukur Cornwell Park One Tree Hill të qytetit në Auckland. Dalja në piknik që nga viti 1999 për shqiptarët në Aucland sikur u bë tradicionale.  Grupi organizues: Xhevdeti, Vetoni, …  të ndihmuar nga Tahiri, Ismeti, Enisaja, Luljeta, Vjollca,  Fatmirja, Lavdija, Flutura  etj. kishin sinkronizuar gjitha veprimet si është më së miri që pikniku të ishte sa më festiv dhe sa më i rehatshëm. Manifestuesit ishin lajmëruar me kohë nga sekretarja e Kryesisë së Komuniteti, Zonja Hana Xharra-Bates përmes emaileve për kohën dhe vendin e piknikut. Që në orën 11 të ditës në hyrjen e parkut të mrekullueshëm u duken makinat e para të shqiptarëve me flamuj kombëtar në xhama dhe për pak minuta një aneks i parkut të madh u mbush me manifestues.  Manifestuesit sapo i uruan mirëseardhje, përgëzuan njëri tjetrin, për festën e Flamurit dhe festën e Bajramit të vogël që sivjet ndodhi në të njëjtën ditë, kënduan himnin e Flamurit, dëgjuan fjalën përshëndetëse të kryetarit Ali Hoxha, u ndan gjithsecili sipas dëshirës, kush duke lozur me top, kush duke pirë e hëngër nën hijen e drurëve gjigant të parkut. Bisedat e përzemërta nuk kishin të ndalur. Deri në fund të piknikut gjithçka frymoi shqip. Familjet ashtu siç kishin ardhur u shpërndan për ta vazhduar festimin në restorantin e Bajram Jusufit, biznesmenit nga Kosova, që brenda një kohe shumë të shkurtër ka arritur majat  e suksesit në industrinë e hotelerisë. Bajrami, që më 4 tetor 2009 kish bë me dije bashkëkombësit përmes postës elektronike se me rastin e festës sonë të madhe, Ditën e Flamurit në të dy restorantet e tij të gjithë shqiptarët në Zelandën e Re do ta kenë sofrën shtruar falas.