Rreth veprave të shkrimtarëve Pierre-Pandeli Simsia, Ilir Borova dhe Skifter Këlliçi që jetojnë e punojnë në SH B A.
Të tre këta shkrimtarë, me botimet e tyre gjatë kohës së qëndrimit në SHBA, sjellin një përvojë të re jo vetëm në qëmtimin e materialit bruto, por dhe në përpunimin e strukturimin e tij, duke shkrirë në një përjetimet individuale në këtë vend kampion të lirisë e të vlerave, me kujtesat e trashëguara ideoemocionale nga prej kah vijnë. Është e njohur ideja se ridimenisonimi psiko-gjeografik i shkrimtarit, në rrethana të reja të vëzhgimeve dhe eksplorimeve të tij, fiton mjaft në raport me kredon e tij artistike, aq sa mund të thuhet se tjetërsohet në kuptimin e pasurimit dhe përsosjes së epërme tharmi estetik.
Vetë Niçja pohonte si ky ridimensionim, në kuptimin e lëvizjes fizike dhe transhendentale në kohë dhe hapësirë, është një pasurim i spektrit vëzhgues dhe meditativ të krijuesit të vërtetë, të cilin e ndihmon ta shohë “lëndën e parë” estetike në një raport të ri, me struktura dhe afeksione të reja rrëfimtare.
Në këtë kuptim, shkrimtarët shqiptarë, të rinj e të vjetër, që për arsye ekonomike u larguan nga vendi i tyre në kërkim të një eldoradoje të re poetike, ata që përbëjnë të ashtuquajturën diasporë të re të letrave tona, e pasuruan kamerën e tyre vezhguese e meditative me ndjesi e raporte të reja, duke i bërë një vend të dukshëm mungesës së kujtesës premordiale të vendlindjes, duke e kthyer atë në një kujtesë të re, që shkon nga miti historik deri te metafizika e kulluar.
Veçanërisht shkrimtarët që punojnë, jetojnë e krijojnë në SHBA, në këtë “tokë të re” planetare, siç e ka quajtur dikush, në këtë tokë të lirisë shembullore, që përmbledh në vetvete lirinë fizike, lirinë ekonomike, lirinë morale e mendore, lirinë e plotë të lulëzimit të ndërgjegjes dhe të prehjes së trupit, në tokën frytdhënëse të talentit e të punës njerëzore, kanë gjetur në veten e tyre mundësi të reja shprehjeje e afirmimi, kanë rrokur tema e motive të begata artistike, të cilat i kanë përpunuar e ngritur në sistem velarsh estetike të mirëfillta. Kushtet e reja ekonomike, çlirimi nga barra e mbijetesës së sëmurë shqiptare, mundësia financiare për t’i vetësponsorizuar veprat e tyre, dhe mbi të gjitha liria e aplikuar në sistemin e vlerave të mirëfillta, i kanë vënë këta shkrimtarë në kushte të reja pune e krijimi, i ka pasuruar në kuptimin shpirtëror të fjalës, duke iu ofruar tema e motive të reja, që nën shtresimet e motiveve të së kaluarës, kanë fituar vlera polivalente shprehjeje e meditimi, që nga narrativja deri te dramatikja e lirikja (poezia)
Tre shkrimtarë, tre prirje në “Tokën e Re”
Në këtë ese do të flasim për tre shkrimtarë, që të tre banues në SHBA, por që në artin e tyre ruajnë gjurmët e pathosit të vendlindjes, problematikën shqiptare.
Pierre-Pandeli Simsia, me origjinë nga Berati, tregimtar dhe romancier befasues.
Ilir Borova, poet që me tharmin e tij alegorik e sarkastik të bën menjëherë për vete dhe të ‘detyron’ që t’iu rikthehesh ndjesive që të përcjell poetika e tij. I treti është i mirënjohuri Skifter Këlliçi, i njohur e, deri diku, i afirmuar, autor i shumë prozave kualitative, midis të cilave mund të veçonim romanin “Atentat në Paris”, aq të njohur e aq të mirëpritur nga lexuesi shqiptar e më gjerë.
Të tre këta shkrimtarë, me botimet e tyre gjatë kohës së qëndrimit në SHBA, sjellin një përvojë të re jo vetëm në qëmtimin e materialit bruto, por dhe në përpunimin e strukturimin e tij, duke shkrirë në një përjetimet individuale në këtë vend kampion të lirisë e të vlerave me kujtesat e trashëguara ideoemocionale nga prej kah vijnë.
Pierre-Pandeli Simsia, pas botimit mjaft të suksesshëm të vëllimit me tregime “Le të jem unë Zamira”, libër që u prit shumë ngrohtë nga lexuesi dhe qarqet letrare në Shqipëri e në diasporën shqiptare në Amerikë, vjen me romanin “Një dashuri e vrarë”, botim i Shtëpisë Botuese “Arbëria”, Tiranë 2006. Tendenca për të mos anashkaluar problemet e theksuara sociale të tranzicionit shqiptar, këtij tranzicioni primitiv shekullor, është i spikatur në rrëfimin e autorit, i cili këtë temë e përcjell edhe në librin e tij të parë.
Romani “Një dashuri e vrarë” nuk është një histori sentimentale, përkundrazi, është një dramë e gjallë për shumicën e personazheve të tij, një tragjedi e dhimbshme, aspak e merituar e heroinës. Te kjo e fundit përplaset ëndrra me realitetin, meskiniteti i rrethanave provinciale dhe mentaliteti idiot me botëkuptimin e një idealisteje moderne, në kërkim të vizionit të kulluar për jetën e saj sociale dhe dashurore. Dorina engjëllore, duke ëndërruar fluturimin drejt qiellit të lumturisë, fluturon në të vërtetë drejt vdekjes më të zezë, drejt një humnere të pakthyeshme.
Historia e saj nuk është një histori e shkëptur, por pjesë e një realiteti dramatiko-tragjik që prodhon një shoqëri ende në krizë, e cila nuk vlerëson vlerat njerëzore dhe morali kallp i së cilës ushqen rrënjët e tragjedive dashurore dhe të gjithëfarshme.
Proza është një akuzë për klasën e papërgjegjshme politike shqiptare, e cila dashje pa dashje, është motivuesja e kësaj strukture kriminale, që vret që në embrion ëndrrat dhe nxit tutorët, banditët, mafiozët, llumin e shoqërisë për të uzurpuar të drejtat legjitime njerëzore, ku padyshim bashin e vendit, e mban dashuria e lirë.
Në vëllimin e tij peotik “Me respekt për...”, autori Ilir Borova na përcjell një suprizë të këndshme lirike, plot befasime e situata të freskëta, ku zotëron një humor i hollë, që e përshkon çdo varg të poezive të tij. Relacioni mes shijes poetike dhe relativitetit me kohën dhe vendin e duhur, raporti mes unit të trazuar e plot thyerje të epërme me relacionet meditative lirike, shkrihen në një me strukturat e vargjeve të punuara me kujdes, të lëmuara deri në përsosje. Ai, duke u rrotulluar në balonat e orëve, nuk mund të bëjë dot pa to, në në mënyrë që herëpashere t’i shpojë e t’i sjellë në një formë sa më reale. Domethënë, nuk mund të shkel atë frymë respekti për frymën e harxhuar dikur. Relativiteti i tij me kohën dhe njerëzit kthehet në metaforë të kërkimit të lirisë inidividuale dhe kolektive.
Sfondet e pasura figurative, të veshura me qyrkun e ngrohtë të alegorisë e sarkazmës, i bëjnë poezitë e tij të lexohen me një frymë, duke mos t’u ndarë nga fytyra një buzëqeshje e ngrohtë, rrëzëllitëse. Komunikimi i tij, disi virtual, ku pëzihet ironia e hollë me filozofinë dhe deduksionin që shkon drejt metafizikës, krijon përveç leximit tekstual dhe një lexim tjetër të nënkuptuar, leximin nëntekstual që e përzgjedh vetë lexuesi sipas botëformimit dhe shijeve psiko-etike të botës së tij.
Në një vendosje tjetër rrëfimtare, në një lëndë mitiko-historike, i vendos ngjarjet e tij shkrimtari Skifter Këlliçi në romanin e tij me titull “Dashuri e gdhendur në shkëmb”, sipas motiveve të romanit të famshëm “Përtej largësive” të shkrimtarit disident Bilal Xhaferi. Kërkimi në të kaluarën thuajse prehistorike, në kohën e kryengritjeve ilire të Batos, është një pretekst për të hequr një paralele të nënkuptuar me realitetin aktual, ku edhe pse në kushtet e një ekzistence të dyzuar e problematike, te shqiptarët nuk është bjerrë arketipi i lirisë. Stili i tij i mirënjohur lakonik, pa teprime, lajle e lule të tepërta, pa retorikë e patetikë, sjell në sytë e lexuesit pamje të virgjëra të kujtesës historike.
Në arketipin historik të luftëtarit të etur për liri e drejtësi sociale, Këlliçi, kërkon rrënjët e kujtesës së deformuar historike si rezultat i pushtimeve nga jashtë e nga brenda, që kanë pasuar njëra –tjerën në këtë vend.
E përbashkëta
E përbashkëta e këtyre tre shkrimtarëve me prirje, tendenca e format të ndryshëm estetik është ndjesia e çlirimit nga tabutë dhe kërkimi në zonat heshtjes njerëzore, duke u vetëçliruar nga autocensura dhe makthi i opinionit, që herë-herë e mbërthen shkrimtarin në një grackë fatale.
Si Simsia, ashtu dhe Borova e Këlliçi, përjetojnë një revolucion psiko-estetik, pasi jo vetëm në tematikën e përzgjedhur, por dhe në ndërtimin e ngrehinës estetike të veprave të tyre ndihen komodë e të përgjegjshëm.
“Toka e re”, psikolgjia e re e një komuniteti që ka qindra vjet që kërkon në rrugën e lirisë e të progresit, i ka bërë ata më kërkues në shpalosjet e tyre.
Në lëndën e përzgjedhur prej tyre ka një prirje për të depërtuar në “zonat latente”: Simsia në tabutë dhe makthet ekzistenciale dashurore, Borova në alegorinë që e shikon deri te shfaqjet më serioze njerëzore, Këlliçi në tabutë historike, ku zbulon mekanizmin e mistifikimit dhe keqkuptimit historik.
Të tre e dinë mjaf mirë se çfarë kërkojnë dhe, në këtë kërkim, procedojnë me mjete të begata estetike: me struktura moderne rrëfimi e lirizmi, me thyerje të epërme të situatave e të rrethanave ku i vendosin ngjarjet, personazhet dhe objeksionet e tyre poetike.
Komente nga lexuesit
Koment nga GUEST më 2007-04-27 10:14:29 BILAL XHAFERI ME PELQEN SHUM SI SHKRIMTAR DHE ME PELQEJN SHUM POEZIT E TIJ. NGA MARIGO BELEGU
Koment nga GUEST më 2007-05-29 10:31:57 Bilal Xhaferi eshte nje talent i ralle.Ai diti te shendroi ne art tragjedin came dhe asnje krijim artistik i deritanishem per camet e perndjekur nuk e ka fuqin artistike-gjeniale te shkrimtarit Bilal Xhaferi. Kur u njoha me fatin tragjik te Bilal Xhaferit u trondita aq shume sa qe shkrova nje poezi kushtuar ketij talenti te rralle te letrave shqipe. Albert Shala,shkrimtar nga Gjakova.email:
Koment nga GUEST më 2007-10-31 16:13:26 bilal xhaferi me pelqen dhe eshte shkrimtar shum i mir
Koment nga GUEST më 2008-01-18 14:25:22 bilal xhaferi eshte shkrimtar me bote, te cilen e ka fituar mes te bardhes dhe te zezes, si qytetar shqiptar nuk duhet vetem pena por guximi bashkpunimi per te punuar per token shqiptare
Koment nga GUEST më 2009-03-05 16:58:24 eshte nje shkrimtar shum i mir me pelqejn shum veprat e tij dhe me endje i lexoj
Koment nga GUEST më 2009-12-22 13:15:57 veprat e billall xhaferit jon shum te mira i prefroj shum